Sjå i nåde til oss

 Gode Far! Oslo har feira sodomien, og fremst i pridetoget gjekk våre høgaste tillitsvalde. Det er forførande dårskap. Me veit at det opprører deg. For all god gåve, og all fullkomen gåve kjem frå deg, og "det gode" som ikkje kjem frå deg, er ikkje godt, men vondt og av den vonde. 

Sjå i nåde til oss i Jesu namn. Tilgje oss vår arrogante toskeskap. Tilgje oss at me feirar det som du fordømmer. Tilgje oss at me seier ja der du seier nei. Tilgje oss at me framstiller det vonde som godt og det gode som vondt, det skadelege som gagnleg og det gagnlege som skadeleg. 

Me som kjenner deg veit at du er heilag, og at du ikkje let deg spotta. Me veit også at dommen alltid startar i ditt eige hus, i kyrkja, og me ber: Reis opp sanne hyrdar for kyrkja di, uredde leiarar som kjenner deg, elskar deg, ditt ord og det folket dei skal tena, leiarar som avslører og avviser djevelens bedrageri, som går på dine vegar, og som let seg leida av din Ande. 

Må ordet ditt gå ut som eit tveegga sverd over landet vårt, bora seg djupt inn hjarto våre, skilja rett frå galt, godt frå vondt og driva oss og leiarane våre til omvending og tru. 

Gode Gud! Reins nasjonen vår for urett og falsk stoltheit, for hor og utukt. Må alle som frekt hånar deg, slå blikket ned i skam, innrømma sitt opprør og søkja frelse og tilgjeving ved Kristi kross. 

Me vil at Noreg skal bli eit kristent land, og at dei som bur her skal krona deg til konge i liva sine og ropa ut: "Jesus Kristus er Noregs evige konge. Han er vår frelsar og dommar. Hans lover er gode. Hans vegar vil me følgja." 

Me ønskjer at lovsongen til Jesus skal fylla Oslos gater, og alle gater. At folk skal fornekta og forkasta djevelen, alle hans gjerningar og alt hans vesen, og hylla Jesus som Herre, og berre Han. Amen! 

700 jødar arresterte i Iran

 Etter krigen mot Israel er 700 jødar blitt arresterte i Iran mistenkte for å ha samarbeida med israelarane. Utan rettargang og framlegde bevis er alt fleire av dei blitt avretta. Det er ILTV som melder dette.

Be om Guds beskyttelse over jødane i Iran. 
Be om at dei må få koma seg trygt til Israel. 

Martyrkyrkja. Syria. Minst 20 kristne drepne i Damaskus i dag.

Den kristne avisa Dagen skriv i dag at minst 20 personar ble drepne og over 50 såra da ein sjølvmordsbombar gjekk til åtak på  Mar Elias-kyrkja i bydelen Dweila i Damaskus søndag. Åtaket skjedde under ei gudsteneste i den gresk-ortodokse kyrkja, som ligg i utkanten av den syriske hovudstaden. Gjerningsmannen skal ha vore knytta til terrororganisasjonen IS. 

Gode Gud! Sjå i nåde til alle som er råka av denne ugjerninga. Trøyst dei som sørger, læk dei skadde, og fyll dei truande med tru, håp og nytt mot. Må dei som har vore involverte i planlegginga av attentatet bli avslørte, arresterte, dømde og straffa på ein rettferdig måte. Amen! 

India. Dag 1

 

Kart og kjelde: operationworld.org

Folketal: 1,463,865,525
Hovudstad: Dehli
Største religion Hindu (74,3%)
Prosent evangeliske 2,2%

India er verdas mest folkerike land.
Ingen av verdas nasjonar har så mange unådde folkegrupper som India.
Dei neste dagane vil me be for dei som bur der.
Kastesystemet er framleis eit stort problem. Dei kastelause utgjer til saman 25% av folketalet. Dei andre har undertrykt desse gruppene i tusenvis av år, og brukt kastesystemet (og hinduismen) for å rettferdiggjere sine skadelege handlingar. FN, den indiske regjeringa, og internasjonale NGO-ar har alle teke grep for å handtere situasjonen. Kyrkjer arbeider òg for å etablere menneskerettar, utdanning, helse og sysselsetjing, og  for å bringa Guds kjærleik og frelse til dalitane. Kyrkja har ein moglegheit til å vise at Kristi kjærleik gjeld for alle menneske, uavhengig av kaste, rase, språk, kjønn og økonomisk status.

Be om at kristne fjernar all kastediskriminering frå kyrkjene sine. 
Be for Dalit Freedom Network som utdannar kristne i spørsmål knytt til dalit-rettar og fridomar. Be om at dei skal lukkast. 
Be for kyrkja i India at ho skal vera vital og misjonal.
Be om at demokratiet i India skal fungera, og at folk sine menneskerettar skal bli respekterte.
Be om at Guds rike skal gå fram med stor kraft midt i aukande forfølging av kristne

Dagens unådde folk: Halwai i India

 

Folketal: 1,65 mill.

Språk: Hindi

Religion: Hinduisme

Kristne: 0,00%

Halwai er høgt respekterte i samfunnet pga dei gode søtsakene som dei lagar.

Gode Gud og Far! Du er den rette far for Halwai i India. Men enno kjenner dei ikkje deg, og eg ber: Gjer deg kjent for dei! Send visjonære og brennande misjonærar til dei som introduserer deg, dine sanningar, di kraft og din kjærleik for dei, og som gjev dei ditt livgjevande ord. Herre, dei treng å forstå at dei ikkje kan bli frelst gjennom gjerningar eller religiøs seremoniar, men berre ved å ta imot di frelse i Jesus Kristus som ei gåve. Aus Anden ut over dei slik at dei ser sine synder, og Jesus som frelsaren frå all synd, og løys dei frå hinduismens mange åndsmakter.

Må Halwaifolka få Bibelen på det eller dei språka som dei forstår best. Hjelp familiane å vera gode mot kvarandre, og eg ber om samhald, truskap og kjærleik i familiane.  Eg ber også om at alle vaksne skal leva edrueleg og ansvarleg. No ser eg fram til at Halwai skal bli innlemma i din familie, og at det skal etablerast ei levande og dynamisk Halwai-kyrkje som kan kan formidla deg til folket på ein kraftfull og truverdig måte. Amen!

Martyrkyrkja. Nigeria

 

I dagane rundt den 18.juni vart 200 kristne i Nigeria drepne av tungt væpna fulaniterroristar. Desse fulaniane driv no med etniske reinsing av kristne for å overta landområda deira. 

Styresmaktene er likesæle og uinteresserte i å hjelpa. 

Enno ein gong vender me oss til deg, vår gode himmelske Far og ber: sjå i nåde til dine barn i Nigeria. Hald dei oppe med di rettferds høgre hand. Ta makta frå fiendane deira. Amen! 

Dagens norske kommune: Gulen i Vestland

 

Folketal. 2234

Kommunesenter: Eivindvik
Næringsliv: Jordbruk og fiske

Kyrkje og kristenliv: DNK har èi kyrkje, og indremisjonen har eit bedehus på Indrevær. 

Gulen har to krossar i sitt våpenskjold. Det fordi det er funne fleire steinkrossar frå førkristen tid i kommunen. Gulen var ein tingplass i middelalderen, og enno blir lagmannsretten i Bergen kalla Gulating. Gulatingslova frå vikingtida er den beste kjelda til kunnskap om kristenretten som vart vedteken på Moster i 1024. Det er gamle og djupe kristne røter i Gulen, men kristenlivet i kommunen i vår tid er etter mi erfaring magert. 

Takk Gud for alle dine sanne barn i Gulen. Må dei stå deg nært. Forny dei ved ditt ord og din Ande. Fyll dei med kraft og nåde. Grunnfesta dei i ditt ord. Gjer dei sterke og ekspanderande i striden for evangeliet og det gode. Hjelp dei truande å stå saman i lovsong, bøn, diakoni og evangelisering, og må ditt kall til omvending og tru nå ut til alle innbyggjarane i kommunen. Aus Anden din ut over Gulen slik at dei som bur der kan koma til levande tru på Jesus. Hald di vernande hand over familiane slik at dei held saman i gode og vonde dagar, og fyll heimane med lys, glede og varme. Må alle barn og unge i Gulen ha ein trygg og god oppvekst. Velsign den politiske og administrative leiinga, skulane og helseinstitusjonane, politiet og dei andre offentlege etatane, samt alt godt og sunt næringsliv, og me ber om ein høg fagleg og etisk standard på dei lokale mediebedriftane.  Må alle vaksne i kommunen leva edruelege liv, og vera gode føredøme for barn og unge. Må det gå Gulen vel, det ber me om i Jesu namn. Amen!

Abort fram til fødsel avkriminalisert i England

 

Alliance Defending Freedom (ADF) melder i dag at Underhuset i det britiske parlamentet har vedteke eit lovutkast som avkriminaliserer abort fram til fødselen, noko som inneber at kvinner som sjølve drep fosteret ikkje skal bli etterforska, tiltalt, dømt og straffa. No blir vedtaket sendt over til Overhuset for ratifisering. Be til Gud om at lordane set foten ned til forsvar for kvinner og barn. Det er lett å sjå for seg no at dette fører til at kvinner døyr som eit resultat av eige inngrep, og så kjem kravet om trygge "seinabortar" på sjukehus.

Dette vedtar altså eit parlament som har vedteke at det er forbode å be stille bøner for ufødde barn innafor ei grense på 300 meter frå inngangen til ein abortklinikk. Dette er ein kosmisk kamp for livet. Ver med å be:

Gode Gud! Sjå i nåde til England. Må lyset ditt fløyma over denne nasjonen og løfta folket opp åndeleg og moralsk slik at vanlege folk og politikarar forstår at det edle og sanne er å verna om dei ufødde frå dei er unnfanga, og start med lordane i Overhuset. Amen!

Ei bøn inspirert av Salme 135

 Eg lovar deg, Herre, fordi du er god, og alltid gjer det som godt er.

Du valde ut Israel til å vera din eigedom, 

og alle kristne til å vera dine barn og arvingar. 

Du er stor, større enn alle gudar, og du gjer akkurat det du vil. 

Du gav Kanaans land som eigedom for Israels folk. Der skulle dei bu og trivast. 

Du styrer vær og vind, fell dommar, 

og gjer teikn og under for å demonstrera di makt for alle "faraoane" i verda 

som plagar folket ditt og set grenser for tenarane dine. 

HERREN er ditt namn til evig tid. 

HERREN skal du kallast frå slekt til slekt. 

For du skaffar folket ditt rett, og du syner  tenarane dine medkjensle. 

Me lovar og ærar deg denne dagen. 

For det som var sant i går, er sant i dag, 

og du vaker over ordet ditt for å fullbyrda det. 

Noreg i opposisjon til Gud

 Det offentlege Noreg opponerer mot Gud på så mange måtar: Legalisering av fosterdrap, normalisering av sex før ekteskap i undervisning av barn,  innføring av skeiv teori i skulen med påfølgjande aksept av homoseksuelt samliv, ja, nokre oppmuntrar dei unge til å prøva seg fram, introduksjon av kjønnsidentitet og psykologisk kjønn for småbarn heilt ned i barnhagen. 

Så er det også grunn til nemna den fientdlege haldninga regjerina og støttepartia hennar har til Israel. Det provoserer Gud.

Gode Gud! Sjå i nåde til Noreg. Tal til oss som bur her. Gjennomlys oss så me ser våre synder. Gje oss som nasjon å venda om til deg, og innretta lovene våre og liva våre etter dine lover. Me ber om ei vekking som bles kraftfulle over heile nasjonen fram til Jesus kjem attende for å dømma levande og døde. Amen! 

Krig mellom Israel og Iran

 Krigen mellom Israel og Iran rasar no på sjette døgnet. 

Far i himmelen! Me ber om vern for alle sivile i Iran og Israel som blir eksponerte for bomber, rakettar og droner. Gode Gud! Spar dei for død og alvorleg skade på kropp og sjel. 

Me ber i Jesu namn om at prestestyret i Iran no skal falla og bytast ut med eit demokratisk styresett. 

Me ber om fred og eit godt samarbeidsklima  mellom Iran og Israel. 

Me takkar deg for den kristne vekkinga som brenn i Iran. Ta vare på denne flammen midt i stormen, og lat den ta seg kraftig opp og spreia seg over heile landet. 

Og så ber eg spesielt for Kristkyrkja sine vener i Iran: Golara, Arshin, Narges, Hamid, Serveh og Avan

Skuleskyting i Graz i Austerrike.

 I dag drap ein 15 år gamal gut 10 medelevar pluss seg sjølv i byen Graz i Austerrike. 12 er alvorleg skada. Det er ein djup tragedie og ei botnlaus sorg. 

Hald med di sterke hand oppe alle som no er knuste som følgje av denne masseskytinga. Trøyst dei sørgande, og gje lækjedom til alle som ligg hardt skada på sjukehus. Sjå i nåde til Graz og Austerrike, og hjelp folk å venda seg til deg med si naud. Amen! 

Kristenforfølging i Aust-Ukraina

Rådet for Baptistkyrkjer. Foto: Forum 18

Ein domstol i den russisk-okkuperte byen Donetsk bøtela den 23.mai pastor Vladimir Rudomyotkin tilsvarande fleire dagers løn for å ha arrangert eit møte for Rådet for Baptistkyrkjer utan å søkja om lov fra styresmaktene. 

To dager tidligare straffet ein annen domstol i Donetsk St. Josephs romersk-katolske kyrkje for ikkje å ha gjeve opp sitt fulle offisielle namn når dei søkte om å driva kristen misjon. 

Ein domstol i Enerhodar bøtela ein person med ein sum tilsvarande løn i 3 veker for å ha organisert eit fellesskap "kor såkalla religiøse tenester blei haldne på søndager".

Kjelde: Forum 18

Gode Jesus! Takk for din uendelege omsorg og truskap mot dine barn. Takk for at du er med dei truande i Aust-Ukraina i alle dei forfølgingane og prøvingane som kjem over dei. Hjelp dei å stå fast i deg, og fryda seg i deg trass i alt dei vert utsette for, og gjer dei sterke i deg. Amen! 

Grønland

Bilde og kjelde: operationworld.org

Grønland, verdas største øy, er i fokus som aldri før i og med president Donald Trump sitt uttalte ønskje om å annektera øya, denne er i dag ein del av Danmark. Men han om det. Vår oppgåve i dag er å be Herren om å overta det grønlandske folket sine hjarte. 

Folketal: 55 745
Hovudstad: Nuuk

Største religion: Kristendom (96,6%)
Prosent evangeliske: 4,7%

Nesten kvar busetnad på Grønland har ei luthersk kyrkje – men mange manglar ekte åndeleg liv. Be om fornying. Moderne kultur kolliderer med grønlendarane sine gamle levemåtar, og mange strir no med umoral, seksuelt misbruk, alkoholisme, psykiske lidingar og sjølvmord. Nokre truande urfolk og utanlandske misjonærar tener Jesus i Grønland, og ser vidunderlege frukter av Den Heilage Andens verk. Be om at dette held fram. Takk Gud for nye flystriper som opna avsidesliggande busetnader for teneste.

Me ber i Jesu namn om at du Herre Jesus, skal lysa for grønlendarane, og koma til dei med frelse, håp,livsmot og ny livsmeining. Fyll dei med Anden på ein slik måte at dei aldri meir kjenner trong for å rusa seg på rusmidlar og ulovlege seksuelle erfaringar. Må dei finna deg i ditt ord, og bli ivrige bibellesarar, og misjonærar for folket sitt og for andre urfolk på nordkalotten. Amen! 

Fengsla pastor i Iran er blitt råka av hjerneslag

 

I 2017 vart pastor Nasser Navard Gol-Tapeh dømd til ti år i fengsel for sitt kristne engasjement. Sjølv om han vart benåda og sleppt fri i 2022, vart pastoren plutseleg arrestert på nytt den 6. februar i år. 

Etter denne siste arrestasjonen vart pastor Nasser halden utan tiltale og nekta juridisk representasjon. Som siste utveg starta han ein sveltestreik kort tid etter fengslinga. Dessverre vart han funnen medvitslaus i si einecelle den 17. mars. Pastor Nasser vart deretter frakta til sjukehus, der det vart fastslått at han hadde fått eit slag.

Den 63 år gamle konvertitten fekk grunnleggjande medisinsk behandling og fekk øvingar for å hjelpe til med å gjenvinne rørsle på venstre side av kroppen. Trass i legens tilrådingar om fysioterapi og vidare behandling, vart han deretter sendt tilbake til fengsel. Sjølv om pastor Nasser sidan har avslutta sveltestreiken, held han fram med å lide av manglande rørsle i venstre arm og bein.

I tillegg til arrestasjonen av pastor Nasser, vart pastor Joseph Shahbazian og to kristne kvinner også tekne i varetekt den 6. februar. Det vert no uttrykt bekymring for lagnaden til dei to kvinnene, der den eine er sidan blitt identifisert som "Aida." Ho vert truleg halden i kvinneavdelinga i det berykta Evin-fengselet i Teheran. 

Gode, allmektige Gud! Me ber i Jesu namn for pastor Nasser at han skal få lækjedom for skadane hjeneslaget har påført han, og at han skal få den medisinske behandlinga han treng for å koma seg gjennom dette meiningslause fengselsopphaldet. Ver også med Joseph Shabazian og dei to kvinnene som er nemnde her. Hald dei oppe i trua og gjer dei sterke ved nåden i Jesus Kristus. Må dei styrkast med Den Heilage Andens kraft og nåde. Må ditt nærvær stå klårt for dei, slik at dei ikkje kjenner seg rikeleg trøysta og aldri åleine. Og så ber me i Jesu namn om at dei skal bli sette fri, og at den dagen skal framskundast. Amen! 

Israel og Noreg

 

Me ber i dag om fred for Jerusalem. Me ber om at Noreg skal bli eit land som velsignar Israel og det jødiske folk. Me ber om leiarar i Noreg som elskar dette landet, og som støttar jødane i kampen for å overleva. Me ber om at all antisemittisme skal reinsast ut av norske folks hjarter. 

Herre, velsign og bevar Israel, lat ditt andlet lysa over landet og folket og ver dei nådig, løft ditt åsyn på dei og gje dei fred. Amen! 

Masfjorden i Vestland

Kart: SNL

Folketal: 1694

Kommunesenter: Masfjordnes

Næringsliv: Bygg og anlegg. Vassforsyning. Kraftproduksjon. Reiseliv. Jordbruk (storfe). 

Kyrkje og kristenliv: DNK har tre kyrkjer, ei fjellkyrkje og eitt anna forsamlingslokale (Granneheimen bedehus). Når det gjeld bedehus er det eitt i Masfjordnes (Betel), eitt i Hatlevik og eitt på Haugsvær. 

Gode Gud! Må alle som bur i Masfjorden få eit livsforvandlande møte med Jesus. Styrk og forny dei kristne, og hjelp dei å halda saman og leva som Jesu sanne læresveinar. Hald di hand over barn og unge og verna dei mot alt som kan bli dei til skade. Må dei få veksa opp i trygge, varme og rusfrie heimar. Velsign kommunen med godt leiarskap, og næringslivet med gode resultat. Amen! 

Alvorleg trafikkulukke ved Narvik

 Gode Gud! Må din fred koma til alle som på ein eller annan måte er berørt av trafikkulukka på Bjørnefjell i går. Me ber om lækjedom for dei skadde, og din spesielle trøyst til familie og vener av dei omkomne. Må alle som ferdast på vegane våre i dag ferdast trygt.

Ghana

 

Kjelde: Operation World

I Ghana bur det 35 mill menneske.frå mange folkegrupper som snakkar til saman 84 språk. Engelsk er administrasjonsspråk.
Kristendomen er den største religionen. 
Ghana har nytt ein djup fred i mange år.
Hovudstad: Acra 

Ghana har fleire etniske grupper og trusretningar, men er stort sett fredeleg. Pris Gud! Utdanningssystemet og grunnlova har samla alle etnisitetar og hjelpt å byggje eit stabilt demokrati. Nesten halvparten av Ghanas høgt utdanna borgarar bur i utlandet. Dette bremsar utvikling og velstand heime. 

Be om at leiarane i regjeringa vil søkje rettleiing frå Gud, og ikkje frå menneskelege filosofiar eller frå åndene.

Unge menneske er nøkkelen i innsatsen for å bringe vekking til Ghana. Mykje av befolkninga er under 15 år, men spesifikke tiltak for å nå dei er utilstrekkelege, trass i deira åndelege openheit. Dette er spesielt tilfelle utanfor dei store byane. I landsbyane har islam og afrikanske tradisjonelle religionar ofte overtaket. 

Be for omvending og disippelgjering av ei ny generasjon kristne som vil gjere ein innverknad i det religiøse, kulturelle, politiske og økonomiske livet i Ghana.

Islam har sett seg føre å erobre Ghana og gjer alvorlege framsteg. Talet på muslimar har auka betydeleg gjennom fødselsratar, immigrasjon og omvending (særleg muslimske menn som giftar seg med ikkje-muslimske kvinner). No bur fleirtalet av muslimar i dei sju ikkje-muslimske sørlege regionane. Moskéar dukkar opp overalt, og islam blir ein dominerande kraft i det politiske landskapet. Utdanning er eit område for islamsk merksemd: grunnlegging av islamske utdanningsinstitusjonar i Ghana og tilbod om stipend for lovande unge ghanesarar til å studere i muslimske land. I muslimske område aukar religiøs spenning og forfølging av ikkje-muslimar. Trass i dette finn eit betydeleg tal muslimar, inkludert imamar, Kristus som sin Frelsar. 

Be for kjærleg vitnesbyrd frå truande og for at Den Heilage Ande skal vinne mange fleire muslimar til Jesus.

Be om at folk skal forstå at islam er ein religion utan sanning, frelse, liv og kraft.

Be om at islams fremgang skal stoppast i Jesu namn.  

Be om at gode menneske skal ta ansvar for unge jenter fanga i prostitusjon og foreldrelause gutar som lever på gata.

Be om ansvarlege og ukorrupte politikarar som for alvor tek tak i samfunnsproblema for å løysa dei.

Be om at ghanesarane skal ha ei rein og usmitta tru, og avvisa all trolldom frå gamal animisme, og all islamsk lovlære. 

Be om at dei truande skal studera Bibelen, og næra seg dagleg på ditt ord. 

Be mot all seksuell promiskuitet, og at ghanesarane skal utøva sjølvkontroll og følgja Jesus og Guds ord på dette livsområdet. 

Anke avvist for tre fengsla konvertittar i Iran

For nokre veker sidan bad me for dei tre som er på bileta under. No må me hugsa dei enno meir i bønene våre. Forfølginga i Iran har gjerne så langt råka prestar og pastorar, men det nye er at også vanlege kristne vert dømde til strenge straffer. 

      Frå venstre: Abbas Soori, Narges Nasri og Mehran Shamloui 

Foto:Article 18 

Den 8. mars vart tre kristne konvertittar i Iran, inkludert ei kvinne som var gravid med sitt første barn, dømde til lange fengselsstraffer for å ha delteke i aktivitetar knytte til deira religiøse tru. 

Dommen vart anka av alle tre Jesu etterfølgjarar, som kvar hadde fått straffer på over ti års fengsel. Men den 26. april vart det kunngjort at ankedomstolen hadde avvist deira klager, og sa at dei rettslege avgjerdene vart gjort "med tanke på omfanget av [dei kristne sine] aktivitetar, og deira skadelege verknader."

Be om at Herren vil gje oppmuntring, styrke og trøyst til kvar av desse nyleg fengsla truande, og til dei mange andre kristne som for tida er fengsla i Iran. Må Guds Heilage Ande verke mektig på politikarane i landet slik at dei kan innsjå det store behovet for reform, rettferd og toleranse på vegner av våre iranske brør og systre i Kristus.

Gujjar med muslimsk tradisjon frå Pakistan

 

Det er 2 568 000 gujjarar i Pakistan (Kashmir). Alle er muslimar. Ingen kristne er registrert, ei heller kristne vitner, så her er det stummande mørkt. Språket dei snakkar kallast "hindko". 

Kjære Herre Jesus! Det folket som lever i mørket skal sjå eit stort lys, og for dei som bur i dødsskuggen skal lyset stråla fram. Dette ordet frå boka di proklamerer me i dag over gujjarfolket i Pakistan, og me ber om at modige menn av ditt hus skal reisa ut for å forkynna evangeliet og planta di kyrkje i dei nordaustlege delane av Pakistan. Pakistanske gujjarfolk skal ikkje mangla representantar framfor di truna i himmelen, så opna no nokon av dine venners hjarte for dette folket, og dette folket sine hjarte for dine sendebod. Amen! 

Fedje i Vestland

 

Fedje kommune ligg med sine 519 innbyggjarar heilt ute mot storhavet, med Nordsjøen som næraste nabo. Det er ein værhard plass på jorda. 

Arbeidsstyrken er i stor grad knytt opp til Fedje trafikksentral som dirigerer store skip inn til og ut frå Mongstad. Nokre er engasjert i reiselivsnæringa. 

 Fedje kommune reklamerer for andaktar på sjukeheimen på heimesida si, og det seier litt om ein sterk kristen tradisjon der. Kanskje ikkje så rart med tanke på at Fedjebuen i hundrevis av år har vore avhengig av eit lunefullt hav, og at dei støtt og stadig har vore på kne for å be om at mannfolka deira skulle koma trygt heim frå fiske. 

Kyrkje og kristenlivet er sentrert om kyrkja og bedehuset. 

Gode Gud! Velsign Fedje og alle som bur der. Må ditt rike gå fram der, viljen din råda i folks liv, kyrkja blomstra og alle finna kvile for sine sjeler i deg.