Palestinsk millitsgruppe skremmer kristen kyrkjelyd i Jifna

Den 25.april rapporterte ei kristen kvinne i Jifna, som ligg litt nord for Ramallah på den såkalla Vestbreidda, til palestinsk politi at ho hadde vore utsett for eit mindre biluhell. Ho meinte at sjåføren i den andre bilen hadde skulda for uhellet, og melde han for dette. Problemet var imidlertid at den andre bilføraren var sonen til ein framståande medlem av Fatah.

Under den neste gudstenesta i kyrkjelyden til denne kvinna dukka det opp ein millits på 30 væpna menn som skaut i lufta og kasta brannbomber i kyrkjerommet. Det vart omfattande skadar. Desse mennene kravde at kvinna skulle trekkja klagemålet mot sjåføren som ho meinte hadde skuld i skadene på bilen hennar.

Palestinske styresmakter sette ned ein såkalla "forsoningskommisjon". Kvinna møtte fram, og for ikkje å setja andre i ein farleg situasjon, trekte ho klagemålet. Dette syner at kristne ikkje har nemneverdig rettstryggleik i dei palestinske sjølvstyreområda.

Kjelde: Middle East Concern og Voice of the martyrs.

Gode Far, styrk dine barn i dei palestinske områda på Vestbreidda og i Gaza slik at dei, trass motstand, vitnar om Jesus for høg og låg. Hjelp dei slik at dei ikkje vert introverte og let seg styra av frykt. Gje dei stor tolekraft og besluttsamheit. Så ber me no for alle som er skræmde etter denne valdsepisoden at du skal dempa skrekken, og me ber om englevakt for desse folka no. Amen!