Hyeon Soo Lim sett fri frå nordkoreansk fangenskap og vel heime i Toronto.

Hyeon Soo Lim har i lenger tid vore på mi bøneliste, og har tidlegare også vore omtalt i denne bloggen. Han vart fengsla i Nord-Korea for to og eit halvt år sidan, etter å ha reist inn og ut av landet 20 gonger dei siste åra for å hjelpa den sveltande og utfattige befolkninga i landet. Målet var m.a. å innføra nye, effektive jordbruksmetodar som kunne gje bøndene større avlingar. Jorda i Nord-Korea er ekstremt utpint.

Lim er opprinneleg frå Sør Korea, men har i fleire år vore pastor i Light Korean Presbyterian Church i Toronto.

Etter arrestasjonen vart han dømt til livsvarig fengsel, truleg for å ha undergrave nordkoreanske verdiar.

Han fortel om tøffe tider i arbeidsleiren, men også om Guds omsorg og truskap. Han erfarte at sorga vart snudd til fryd og glede.

Kvar søndag arrangerte han gudsteneste. Den einaste frammøtte var han sjølv. 130 søndager gjorde han dette. Ingen grunn til messefall.

Fem nye koreanske salmer dikta han i fangenskapstida. Desse vart sunge i kyrkja hans på søndag. Folk strigret. 

Men opphaldet var ein effektiv slankekur. Kiloane rann fort og greitt av han etter kort tid.

Arbeidet var hardt, og Lim var ofte uendeleg trøytt, sliten og sjuk.

Men no skal me takka Gud:

Takk, gode Gud for din truskap. Takk at at du sørga for at Lim kunne koma heim til familie og kyrkjelyd. Du er ein Gud som høyrer bøner. No må du la Lim koma til krefter att og leida han vidare etter din plan og vilje. Amen!

Sør-Korea

Sør Korea er 99000 kvadratkilometer stort, og det bur over 48 millonar menneske der. Landet vart etablert i 1953 som eit resultat av Koreakrigen, utan at det vart nokon formell fredsavtale med Nord-Korea. Etter krigen låg Sør Korea i ruinar, og folket levde i den ytste fattigdom. Men utviklinga har vore formidabel, og i dag utgjer landet den 11. største økonomien i verda. Sør Korea har få naturressursar, og er heilt avhengig av eksportindustrien sin. Det gjer økonomien deira sårbar for svingningar i råvareprisane. Sør Korea er eit kunnskapsbasert samfunn som satsar stort på utdanning av barn og unge.
Historisk har landet ofte vore okkupert av nabonasjonar, sist av Japan frå 1910 til 1948.
Frå 1987 har Sør Korea hatt eit demokratisk styresett.
Religiøst har konfucianismen og buddhismen stått sterkast. Dette er ein arv frå Kina. Men i dag er kristendomen den største religionen, men mange har ingen religion i det heile tatt.
Landet har vore velsigna med åndeleg vekking i mange tiår (vekkinga starta i 1907 i Pyongyang, hovudstaden i dagens Nord-Korea), og i dag er det 15 millionar kristne i landet, av desse tilhøyrer 8,2 millionar evangeliske kyrkjesamfunn. Mange av kyrkjelydane er veldig ivrige, og i dag kan du finna koreanske misjonærar over heile verda. Seks av dei ti største kyrkjelydane i verda finn med i Sør Korea.
Kyrkja i Sør Korea har vore bygd opp som eit resultat av bøn. Dei truande i landet er kjente for å stå opp tidleg om morgonen for å samla seg til bøn kl 05.00. Denne praksisen har løyst ut mektige himmelkrefter over nasjonen. I dette har dei vore eit førebilete for alle kristne i heile verda. 
Likevel er det sekularismen som breier seg snøggast i landet i dag. Den kristne vekkinga har stansa opp, og økonomisk velstand ser ut til å sløva folks åndelege lengsel og gjera dei mindre årvakne.

Det er gjennom dei siste åra vorten eit stadig større gap mellom rike og fattige i landet. Den moderne konkurranseprega tida med aukande krav og forventningar om å vera vellukka, har ført til aukande sjølvmordsrate, raskt veksande sex-industri, gulltid for dei som held på med plastiske operasjonar og aukande mengde underhaldningsvald i media. Mange, mange er internettavhengige.

Be om at Gud reinsar kyrkja si i Sør Korea for materialsime, karrierejag og juks, og frå folk som utøver makt til eigen fordel.
Be om kyrkja i staden blir fylt av  Kristi kjærleik og Andens kraft, slik at vekkinga kan ta ny fart.
Be om visdom til leiarane i landet, og om rettferd for dei mest sårbare gruppene i folket.
Be om at kristne verdiar som ærlegdom, måtehald, rettferdig fordeling, likeverd og miskunn skal gjennomsyra heile samfunnet. 
Be om at landet skal vera i stand til å gjennomføra ein god gjenforeningsprosess med Nord-Korea når tida er inne for det.

Sør-Korea

I dag og i morgon ber me for Sør-Korea.
Sør-Korea er den 11. største økonomien i verda. Sidan 1953, då landet var på botn etter Koreakrigen, har dei bygd opp ein enorm industriell kompetanse retta mot eksport, slik som Japan også har gjort det. Landet har lite råvarer, men dei menneskelege ressursane er store. Koreanarane er disipinerte og flinke til å jobba målretta.
Over 30% av befolkninga er kristne. Det pågår ei kontinuerleg vekking i dette landet, basert på bøn. Dei truande står tidleg opp kvar morgon og møtest i kyrkjene, eller på spesielle bøneplassar, for å søka og prisa Gud. Dette har resultert i  eit veldig gjennomslag for evangeliet. Denne bønerørsla starta med vekkingar i Pyongyang i 1907. Kristne nordkoreanarar tok vekkinga med seg då dei under krigen flykta sørover. I dag er Sør-Korea eit misjonsland i den forstand at dei sender misjonærar ut til snart alle verdas land. Likevel ser det no ut til av vitaliteten i den kristne rørsla flatar ut og går noko attende. Nokre meiner dette botnar i sjølvrettferd og stoltheit hos mange kristne leiarar som har ein tendens til å måla Guds gunst i personleg framgang, og sjå ned på dei med mindre "suksess". Splittingar basert på personleg ambisjonar har vore som ein pest mellom dei truande dei siste åra.
Landet har nær 49 millionar menneske. Dei som ikkje er kristne er anten buddhistar (23%), eller dei har eit meir konfuciansk livssyn (30%).

Gode Gud! Takk for det VELDIGE og UNIKE du gjennom åra har gjort i Sør Korea, og for all den velsigning som dei truande i dette landet har delt med resten av di verdsvide kyrkje. Må din Ande rettleida dei kristne leiarane i landet slik at dei audmjukar seg innfor deg og kvarandre og ikkje går i djevelens snare.  Må din Andes nærvær framleis kvila over Sør-Korea og gje vekkinga ny fart framover. Velsign dei unge kristne slik at dei får eit djupt personleg forhold til fridomen du har gjeve dei i Jesus Kristus. Gje alle sørkoreanske misjonærar som tener deg i andre land og kulturar alt det dei treng for ånd, sjel og kropp, og for å sjå at ditt rike går fram. Å gode Gud. Ta vare på hjarto, og hjelp dei kristne å ta vare på den fagre skatten, din kjærleik i Jesus Kristus, som ein gong vart betrudd dei. Gje også landet politisk stabilitet, og leiarar med høg moralsk integritet. Amen!
Hovudstaden Seoul er ein storby med nær 10 millionar innbyggjarar.