Godt nytt frå Pakistan

Den kristne barneskulerektoren Saira Khokhar som var meldt til politiet for blasfemi, er sett fri av politisjefen i Lahore. Han finn ikkje det minste grunnlag for klagemåla mot henne som sa at ho skulle ha skjenda Koranen. Det er modig gjort av han å setja henne fri. Den muslimske mobben klarar som regel å få politiet på si side med stygge trugsmål. Dei som vågar å gå mot dei, risikerer liva sine. Lat oss halda fram med å be om at regjeringa får mot til å fjerna den meiningslause blasfemilovgjevinga i landet som definerer all kritikk mot Muhammed og Koranen som blasfemi som skal straffast med døden eller livsvarig fengsel. Mange kristne sit inne og ventar på at saka mot dei skal koma opp. Det tek som regel lang tid.  

I dei fleste tilfella der kristne vert anklaga for blasfemi, er dette vikarierande. Mange gongar handlar det om rett til landområder. Pakistan er framleis langt på veg eit føydalsamfunn, og kristne skal helst ikkje eiga noko, men tena muslimane. Dei er khokhar, dvs. kastelause.  

Sjølv om Saira no er utanfor mistanke, er ikkje faren over. Så mange gongar er andre i liknande situasjonar rett og slett blitt myrda av ekstreme grupper som ikkje risikerer så mykje med det.

Gode Gud! Du gav oss Sonen din til soning for våre synder. Me takkar og ærar deg for det. Takk også for at Saira Khokhar no er sett fri og utanfor mistanke. No må du verna henne og poilitisjefen mot hemnaksjonar frå den muslimske mobben. Set ein stoppar for alle som legg vonde planar mot dei rettferdige.

Styrk og vern kyrkja di i Pakistan. Gje dei alt det som verda elles nektar dei, mot til å stå på for Jesus og visdom i høve til alle som ikkje kjenner deg. Fyll dei kristne  med tru, von og kjærleik, og må evangeliet langsamt trenga gjennom i samfunnet og endra det frå innsida. Amen.

Imragenfolket i Vest-Sahara

Vest-Sahara er okkupert av Marokko.

Imragenfolket tel berre 22000 menneske og lever som fiskarar på Atlanterhavskysten. Dei  har utvikla ein særeigen fangsmetode der dei fiskar moltefisk ved hjelp av tamme delfinar! Slå den!

Dei snakkar hassaniyya, er muslimar og er heilt unådde med tanke på evangeliet om Jesus. Jesusfilmen og lydfil av NT er tilgjengeleg på språket deira. 

Gode Jesus! Me takkar deg for at ein dag skal evangeliet om riket også nå fram til imragenfolket i Vest-Sahara og gje ein stor haust der. Lat det skje i vår tid. Velsign folket på alle livsområde, og lat framfor alle ting Anden din bli aust ut over dei slik at dei forstår at du er Guds Son, og at dei berre kan bli frelst ved trua på deg. Send dei modige pionerane dine til dette folket, dei blant dine som veit kva det betyr å bera krossen sin. Fri folket frå djevelens undertrykking, og stå fram for dei som den store fridomshelten som frir dei frå synd og vondskap, lækjer dei for sjukdom og fyller hjarto deira med ein kjærleik dei før ikkje ante eksisterte. (joshuaproject.net)

Sumbawa, Indonesia

Sumbawa er eit unådd folkeslag i Indonesia. Dei bur på Sumbawa, ei øy vest for Java, tel 400 000 menneske, er muslimar og snakkar sitt eige språk. Ingen deler av Bibelen er omsett til Sumbawaspråket. Sjølv om dei er muslimar, praktiserer dei sjamanisme og animistiske ritualer, særleg i kristetider.

 Far i himmelen! Me ber om av Sumbawafolket skal innlemmast i din glade familie. Send dine vitne til dei og lat Den heilage ande koma over dei og snu opp ned på tenkemåten deira. Skap tru i hjarto deira, fri dei frå djevelens makt og reis opp di levande kyrkje midt i dette folket. Amen.

13.02.12

Kristen tenåring kidnappa i Egypt

(Kjelde: Australian Evangelical Alliance Religious Liberty Commission)

Amira Gamal Saber, ei 16 år gamal kristen jente vart kidnappa tidleg i desember frå landsbyen sin. Kidnapparane har tatt kontakt med styresmaktene og sagt at jenta ønskjer å konvertera til islam. Saka har hamna i retten, og egyptisk påtalemakt føreslår for familien at jenta hamnar i ein statleg institusjon inntil ho er 18 og kan bestemma religion sjølv. Foreldra gjev ikkje opp kampen for dottera si, og dei appellerer til riksadvokaten.


Herre Jesus! Må du intervenera i Amira sin situasjon. Set henne fri frå overgriparane. Gje henne og familien hennar den styrken som dei treng for å tola det harde presset dei er oppe i. Hjelp alle truande i Egypt å halda blikket festa på deg. Bevar dei i trua slik at dei ikkje vert motlause, men frimodig deler trua si med andre midt i eit fiendtleg miljø.

12.02.2012

Enshi Miao er ei folkegruppe som nesten er heilt assimilert i den mandarintalande hankinesiske befolkninga. Nokre få held ved like gamle ritualer i samband med gravreinsing, noko som heng att etter gamal fedredyrking.

Enshi Miao tel 623 000 menneske. Nokre ytterst få av dei er romersk katolske kristne. Folket manglar generelt heilt interesse for religion. 

 

Herre Jesus! Ingen er så langt borte frå deg at ikkje du kan nå dei med din Ande. Eg ber for dei få kristne i dette folket at dei fullt ut skal forstå rekkevidda av din død og di oppstode, og leva kristenliva sine i krafta frå Den heilage ande. Lat Enshi Miaofolket møta deg gjennom kristne som elskar dei og som kan aktualisera deg og demonstrera Guds rike for dei. Overtyd dei om synd, rettferd og dom, slik at dei kan venda om til deg og få nyta godene av di frelse. Herre, miskunna deg. 

 

Raid mot iransk huskyrkje  

Compass Direct og Mohabat News melder at ei huskyrkje i Shiraz onsdag i denne veka vart raida av iranske styresmakter, og mellom 6 og 10 kristne vart arresterte.  Berre éin av dei er indentifisert: Mojtaba Hosseini, som også vart fengsla ein kortare periode i 2008, og som nok har vore i søkelyset etter den tid.

 Gode Far! Dei kristne i Iran står framfor ein sterk motstandar. Men du er sterkare, og ingen kan stå seg mot deg. Kom våre iranske søsken mektig til hjelp, du som skapte himmel og jord. Lat ikkje føtene deira vakla, men lat dei stå fast i nåden og i Ordet, og fulle av Ande og kraft frimodig dela evangeliet med sine medmenneske, vinna dei for Jesus Kristus og gradvis forvandla samfunnet frå å vera prega av hat og løgn, til å bli prega av kjærleik og sanning. Bryt du i Jesu namn djevelens makt over denne vakre nasjonen.

Nigeria

Agence France-Presse/Getty Image

Midt i julefeirnga har den kristne kyrkja gjennom alle tider markert 2.juledag som den såkalla Stefanusdagen. Bakgrunnen for dette ligg i Herodes sitt barnedrap i Betlehem. Sjølv om Stafanus var den det første Jesusvitne som måtte døy for trua si, var likevel gutebarna i Betlehem dei første som måtte døy for Jesu skuld.

Denne markeringa har fått svært god meining dei siste åra. Det syner seg nemleg at juletida er vanskeleg for kyrkjer i mange land. I fjor var det dødelege åtak mot koptiske kristne i Egypt, året før skjedde det i India. I år var det kristne i Nigeria som fekk smaka lidingsskåla.  Aftenposten.no melder  at på 1. juledag vart minst 35 kristne vart drepne (nokre kjelder seier 39) av 5 bombeåtak retta mot kristne kyrkjer i landet.  30 av offera tilhøyrde den katolske kyrkja  St. Theresa i forstaden Madela like utafor delstatshovudstaden Abuja. Det er den islamistiske gruppa Boko Haram som står bak åtaka mot kristne også denne gongen.  Dei har eit definert mål å gjera Nigeria til ein islamsk stat styrt av sharialover. Det ser ut til at dei er viljuge til å føra landet ut i borgarkrig for å oppnå måla sine.

Av dei 160 millionar menneska som bur i landet, er 51,3% kristne, og den kristne kyrkja veks i følgje  boka Operation World med 2,7% årleg. Dei nordlegaste delstatane er muslimske medan dei i sør er kristne. Forfølginga mot dei kristne er størst langs eit belte som går frå aust til vest midt i landet der me finn ei blanding av kristne og muslimar.

Situasjonen i Nigeria kallar på kristne over heile verda til bøn både for den kristne kyrkja der og for landet generelt. 

Gode Gud og Far! Eg ber i dag om styrke for di kyrkje i Nigeria. Trøyst dei som no sit i sorg etter tap av sine næraste, og gje dei mange gongar attende for den og det dei no har mista. Eg prisar deg som let alt samverka til det gode for dei som elskar deg. 

Gje truande i Nigeria ditt sterke vern, og ver du ei fast borg for dei.

Du som har gjort kyrkja i Nigeria til eit fyrtårn på jorda. Vara ho i kjærleik til fiendane sine slik at dei kristne ikkje gjengjelder vondt med vondt, men overvinn det vonde med det gode.

Takk for all den frimot som denne kyrkja har demonstrert dei siste åra. Lat det som no skjer i landet berre føra til at dei kristne blir enno sterkare, enno ivrigare og enno tydlegare enn før.

Hjelp styresmaktene til å utøva sitt kall på ein effektiv måte.Syn dei korleis dei skal få kontroll over dei valdelege i landet, fengsla og straffa drapsmenn og hindra at slike ting som dette hender.  

Så ber eg om at Nigeria skal få eit rettferdig styre som fjernar korrupsjonen i landet, og som jobbar for å byggja nasjonen og fordela rikdomar og ressursar på ein rett og god måte. Amen!

Jemen

I Jemen er nesten 100% av menneska muslimar, og det er fobode å konvertera til ei anna tru. Nord og sør vart sameinte til eitt land i 1990, og etter det har landet vore prega av borgarkrig. Norjemenittane er sunnimuslimar og dei i sør er shia. I nord har al-qaida eit sterkt fotfeste. Krisa i dagens nyheitsbilete må sjåast i denne samanhengen. Be saman med denne amerikanske misjonæren som jobbar i Jemen, og  som av tryggleiksgrunnar har fått stemma fordreid.