Isak Masih eigde eit jordstykke som godseigaren Mohammed Luqman ville ha, men som han ikkje fekk. Luqman tok då rett og slett jordstykke som sitt eige og sådde det til med søtmaisfrø. Då Isak Masih gjekk ut på åkeren, saman med to av barna sine, for å sjekka ut dette, vart han omringa av menn på motorsykkel, skamslått og skoten i brystet. Han døydde på staden medan dottera Sayma på 12 prøvde å hjelpa. Politiet kom, men ingen vart arresterte. Dei kristne nekta å graveleggja Isak inntil dei skuldige var arresterte. Etter tre dagar fekk dei lovnad om det, men enno er ikkje hovudmannen teken. Drap på kristne vert sjeldan etterforska og tiltalt i Pakistan.
Gode Gud og Far! Du som kjenner sorg og smerte, kom til familien til Isak Masih med trøyst og lindring. Ber særleg om styrke og lækjedom for dottera Sayma og sonen Irshad (15) som var vitne til ugjerninga. Lat Luqman bli funnen, arrestert, stilt for retten og dømt. Hjelp familien til å tilgje den skuldige, og eg ber om at han skal få møta deg og bli frelst frå alle syndene sine.
Ingen kommentarer:
Legg inn en kommentar