Det er urolige tider, med krig og uro mange stader, og det åndelege og moralske forfallet er tydeleg å sjå både i samfunnet og i verdas mange kyrkjer. I Noreg blir det forkynt forførande lærdommar frå mange kyrkjer. Samlivssynder som forkynnarane skulle ha påtala som synd, vert i staden hylla som ekte kjærleik. Dette er ei svær krise som hindrar folk å venda om frå syndene sine og bli frelst. Dommen over falske forkynnarar vil bli strengare enn den som råkar syndarane. Det er tid for å be for landet vårt, og då kan du be slik:
Gode Gud!
Reis opp kyrkja di i Noreg så ho blir godt synleg, som ein by på eit høgt fjell. Gje henne leiarar som elskar deg, ordet ditt, dei truande og heile folket.
Reins kyrkja di for forføreriske lærdommar, og frels oss frå forkynnarar som forfører folk med dei frekke løgnene sine.
Må kvar enkelt kristen følgja deg tett og erfara fridomen og gleda med disippellivet.
Reis opp apostlar, profetar, evangelistar, hyrdar og lærarar som kan utrusta dei heilage til all god gjerning, leiarar som trufast forkynner Kristus, og som kallar alle til omvending, etterfølging og tru.
Må ordet ditt bli forkynt sant, klårt, reint, varmt og kraftfullt både i kyrkjelydane, i heimane, i ulike typar media og ute på gater og torg.
Må løgnene i alle falske ideologiar, religionar og «ismar» bli avslørte i lyset frå Guds ord forkynt i Andens kraft.
Må bodskapen råka nordmenn djupt i samvitet slik at dei vert forskrekka over syndene sine, tek avstand frå dei, vender seg bort frå dei og famnar deg og di frelse.
Må Noreg bli transformert ved Den Heilage Andens kraft.
Hald di gode hand over kongen og kongefamilien, og vern dei mot vonde åndsmakter som er i ferd med å trenga seg inn hos dei. Før kongen og familien hans trygt gjennom problema dei no står i.
Gje oss gudfryktige, ærlege og kompetente politiske leiarar.
Må lovene i landet vårt harmoniserast med dine lover.
Må barna i mors liv få rettsvern heilt frå dei er avla.
Må næringslivet og organisasjonslivet halda ein høg etisk standard så ingen juksar seg til fordeler.
Må Noreg bli kjent for å vera eit land som tek vare på enkjer, farlause, innflyttarar, flyktningar og fattige.
Må alle i Noreg leva edruelege liv, og eg ber om nytt liv og fridom for alle som ligg under for rus.
Me ber deg om å ta vare på freden, og at du skal verna landet mot ytre fiendar.
